Birnir Sigurðarson er fæddur 28. apríl 1996, betur þekktur sem einfaldlega Birnir, og er íslenskur rappari, tónlistarmaður og lagahöfundur. Hann ólst upp í Kópavogi og markaði sér sess árið 2017 sem gestarappari hjá Joey Christ í vinsælu lagi „Joey Cypher“, en það var valið rapplag ársins á Íslensku tónlistarverðlaununum.

Bragi Ólafsson, semfæddist í Reykjavík 11. ágúst 1962, er ljóðskáld, leikrita- og smásagnahöfundur, en líklega þekktastur fyrir skáldsögur sínar. Hann var um árabil meðlimur hljómsveitanna Purrkur Pillnikk og Sykurmolarnir, og er einn af stofnendum útgáfufélagsins Smekkleysa, sem hefur starfað frá árinu 1986 og haft mikil áhrif í íslensku menningarlífi.

Bríet Ísis Elfar fæddist í Reykjavík 22. mars 1999, þekkt sem einfaldlega Bríet, og er íslensk söngkona, tónlistarmaður og lagahöfundur. Móðurafi hennar er af egypskum uppruna og flutti til Íslands árið 1965. Bríet stundaði nám við Laugarlækjarskóla og fór svo í Menntaskólann í Hamrahlíð.

Árið 2019 kom hennar fyrsta bók, Okfruman, út hjá Unu útgáfuhúsi. Bókin var valin ljóðabók ársins af bóksölum og hlaut þar að auki tilnefningu til Fjöruverðlauna. Fyrir næstu ljóðabók sína, Kona lítur við hlaut Brynja tilnefningu til ljóðabókaverðlaunanna Maístjörnunnar.

Elísabet Kristín Jökulsdóttir er fædd í Reykjavík 16. apríl 1958.  Hún ólst upp á Seltjarnarnesi og í Reykjavík og dvaldi í eitt ár í Grikklandi sem barn. Fyrsta bók Elísabetar, ljóðabókin Dans í lokuðu herbergi, kom út árið 1989 og síðan hefur hún sent frá sér fjölda bóka: ljóð, sögur og skáldsögur.

Gyrðir Elíasson er fæddur í Reykjavík, 4. apríl 1961. Gyrðir ólst upp á Sauðárkróki, en hefur búið um um skeið í Borgarnesi, á Akranesi, í Garði, og með hléum í Reykjavík og hefur nánast alla sína fullorðinsævi unnið við ritstörf. Hann hefur sent frá sér fjölda verka af ýmsu tagi: ljóðabækur, skáldsögur og smásagnasöfn, en fyrsta útgefna bók hans var ljóðabókin Svarthvít axlabönd frá árinu 1983.

Hannes Pétursson fæddist á Sauðárkróki 14. desember 1931. Hann lauk stúdentsprófi frá Menntaskólanum í Reykjavík 1952 og kandídatsprófi í íslenskum fræðum frá Háskóla Íslands 1959. Hann stundaði einnig nám í germönskum fræðum við háskólana í Köln og Heidelberg 1952 til 1954.

Linda Vilhjálmsdóttir er fædd 1. júní 1958 í Reykjavík og ólst upp á Seltjarnarnesi. Linda er sjúkraliði að mennt og starfaði við það meðfram ritstörfum um árabil, en frá árinu 2001 hefur hún eingöngu sinn ritstörfum. Ljóð Lindu hafa birst í dagblöðum, tímaritum og safnritum frá árinu 1982. Fyrsta ljóðabók hennar, Bláþráður, kom út 1990. Þá komu allar níu ljóðabækur hennar ásamt úrvali lausaljóða út í einni bók árið 2025 undir titlinum Safnið – Ljóð Lindu Vilhjálmsdóttur.

Magnús Sigurðsson fæddist árið 1984 á Ísafirði. Hann vakti þegar athygli með sínu fyrsta verki, íslenskri þýðingu á stórvirki bandaríska ljóðskáldsins Ezra Pound, Söngvarnir frá Písa (2007). Bókin kom út á vegum Bókmenntafræðistofnunar Háskóla Íslands. Árið 2008 hlaut Magnús Bókmenntaverðlaun Tómasar Guðmundssonar, fyrir ljóðabók sína Fiðrildi, mynta og spörfuglar Lesbíu, þar sem þýðingar Magnúsar á ljóðum rómversku fornaldarskáldanna Katúllusar og Virgils kallast á við frumort ljóð.

Óskar Árni Óskarsson er fæddur í Reykjavík árið 1950. Óskar Árni hefur lengi fengist við ljóðagerð og þýðingar. Hann sendi frá sér sína fyrstu ljóðabók, Handklæði í gluggakistunni, árið 1986. Samhliða ritstörfum hefur hann starfað sem bókavörður. Hann ritstýrði og gaf út bókmenntatímaritið Ský sem kom út á árunum 1990–1994.

Sigurbjörg Þrastardóttir er fædd 27. ágúst árið 1973 á Akranesi. Hún lauk B.A.-prófi í almennri bókmenntafræði frá Háskóla Íslands 1997 og prófi í hagnýtri fjölmiðlun frá sama skóla 1998. Hún starfaði um árabil sem blaðamaður á Morgunblaðinu. Fyrsta bók Sigurbjargar, ljóðabókin Blálogaland, kom út árið 1999 en síðan hefur hún sent frá sér rúman tug ljóðabóka, auk prósaverka og leiktexta.

Vigdís Grímsdóttir er fædd í Reykjavík þann 15. ágúst 1953. Vigdís lauk kennaraprófi frá Kennaraskóla Íslands 1973, BA prófi í íslensku og bókasafnsfræði frá Háskóla Íslands 1978 og prófi í uppeldis- og kennslufræði frá Kennaraháskóla Íslands 1982. Hún stundaði kandidatsnám í íslenskum bókmenntum við Háskóla Íslands 1984–1985.

Þórarinn Eldjárn fæddist í Reykjavík 22. ágúst 1949. Hann nam bókmenntir og heimspeki við Háskólann í Lundi í Svíþjóð frá 1969-1972, íslensku við Háskóla Íslands 1972-1973, bókmenntir í Lundi 1973-1975 og lauk þaðan fil kand prófi vorið 1975. Þórarinn var búsettur í Stokkhólmi á árunum 1975-1979 og dvaldist rúmt ár í Kantaraborg 1988-1989. Frá árinu 1975 hefur hann starfað sem rithöfundur og þýðandi.